تىترەيدۇ كۈنۇ-تۈن قەلبىم تارىسى،
جان ئانا، قىزىڭمەن باغرىڭ پارىسى.
سېنىمۇ ياشارتسام، بارمۇ چارىسى،
بۇيرىغىن، ئۆزۈمدىن مەلھەم ياسايمەن.

ياش ئىدىڭ قۇرغۇيدەك سەنمۇ بىر چاغدا،
قېرىدىڭ پەرزەنتنىڭ پىراقى داغدا.
يۈردۈڭ گاھ قاينامدا، گاھىدا تاغدا،
گۈل بولغىن، جان ئانا، سېنى قىسايمەن.

مۇھەببەت، ۋاپادا ھەممىدىن بايسەن،
بەللىرىڭ مۈكچەيدى، سەن يەنە ئايسەن.
مېنى بار قىلغان سەن، مېنىڭ ئانامسەن،
يۇلتۇزدىن بوينۇڭغا مارجان ئاسايمەن.

كەپتەردەك ياندۇردۇڭ، تاڭلايلىرىڭدىن،
تەر ئەمەس، سۈت ئاقتى ماڭلايلىرىڭدىن.
مېنى دەپ كەتتىڭغۇ دەرمانلىرىڭدىن،
كەل ئانا، باغرىمغا بىردەم باسايمەن.