مەن تۇغۇلۇپ ئۆسكەن يەرلەر، قىزىل گۈلدەك باغلار قالدى،
ئېگىز-ئېگىز خۇش چىرايلىق، ياقۇت تاشلىق تاغلار قالدى.
بۇغا، مارال پادا-پادا ئوتلاپ يۈرگەن سايلار قالدى،
تاغ باغرىدا سەكرەپ ئويناپ، بوتلاق، ئوغلاق، تايلار قالدى.

سۇ بويىدا شىلدىرلىشىپ، تازىم قىلىپ باش ئېگىشىپ،
مەن ماڭغاندا ئۇزۇتۇشۇپ، لەيلى-مەجنۇنتاللار قالدى.
چۇرۇق-چۇرۇق ئويناۋاتقان، شىلدىر-شىلدىر بويلاۋاتقان،
ئاق كۈمۈشتەك چاقناۋاتقان، بالدىن تاتلىق سۇلار قالدى.

جىم-جىم كوچا، ئايدىڭ كېچە، بۇلاق بويلاپ باغچە-باغچە،
يۇلتۇز ساناپ تاڭ ئاتقىچە، ئويناپ-كۈلگەن جايلار قالدى.