1-كۇبلىت :
ئاڭلا! گۈزەلىم سۆيگۈ يولىدا،
جەۋىر-مۇشەققەت تارتسام مەيلىمۇ؟
ياكى جۇدا بولۇپ ئەقىل-ھۇشۇمدىن،
دەرۋىش دىۋانە بولسام مەيلىمۇ؟

1-قايتارما :
مەن ساڭا كۆيۈپ خۇشال يۈرمىدىم،
ئايدەك يۈزۈڭنى يىللاپ كۆرمىدىم.
نېمىدۇر ۋىسال تەمى بىلمىدىم،
كۈنلىرىم سەنسىز كەچسە مەيلىمۇ؟

2-كۇبلىت :
ئارزۇيۇم سېنى كۆرۈپلا يۈرسەم،
ساداقەت بىلەن كۆيۈپلا يۈرسەم.
چىن ئىشقىڭ سۆيگۈڭگە تويۇپلا يۈرسەم،
ئۈمىدلەر بەربات بولسا مەيلىمۇ؟

2-قايتارما :
قالمىدى تاقەت سەنسىز ياشاشقا،
تاپالماي سېنى خەۋەر ساقلاشقا.
نائىل بولالماي ئىسمىڭ ئاتاشقا،
روھىم كۆزى ئوچۇق كەتسە مەيلىمۇ؟