ئىلى، تارىم، قاش، زەرەپشانلاردىن،
ئەسسالام دەيدۇ يۇرتۇم دۇنياغا.
خەلقىمىز قۇچقان شەرەپشانلاردىن،
ئەسسالام دەيدۇ يۇرتۇم دۇنياغا.

مەھمۇد ھەم يۈسۈپ كىتاپلىرىدىن،
ئاماننىساخان خىتابلىرىدىن.
سىرلىق مىڭ ئۆيلەر قاۋابلىرىدىن،
ئەسسالام دەيدۇ يۇرتۇم دۇنياغا.

بوغدانىڭ سۈزۈك زۇمرەت سۈيىدىن،
قاناسنىڭ مۇڭلۇق شاۋقۇن كۈيىدىن.
كۈنەس، تېكەسنىڭ كىگىز ئۆيىدىن،
ئەسسالام دەيدۇ يۇرتۇم دۇنياغا.

ئەجدادلاردىن تا ئەۋلادلارغىچە،
شېرىنلاردىن ھەم  پەرھادلارغىچە.
گۈلىدىن، ئارچىدىن، شەمشادلارغىچە،
ئەسسالام دەيدۇ يۇرتۇم دۇنياغا.